Undanfarið hefur verið unnið að því að betrumbæta leitir.is. Til grundvallar var lagður listi með ýmsum athugasemdum frá notendum er varðar birtingu, röðun, flokkun og fleira. Verkefnið var unnið í nánu samstarfi við Ex Libris (framleiðanda Primo, leitir.is) og sérfræðinga Landsbókasafns Íslands - Háskólabókasafns. Ekki reyndist mögulegt að leysa öll viðfangsefnin, í sumum tilfellum var niðurstaðan ekki eins og búist var við svo að ákveðið var að sleppa eða bíða með að virkja sumar breytingarnar.
Að neðan fer listi yfir breytingar sem voru virkjaðar í leitir.is að þessu sinni:

• „Varstu að leita að:“ eða „Did you mean“ hefur verið virkjað. Ef ekkert finnst í leit kemur kerfið með tillögu að leitarorði. Til dæmis ef slegið er inn „Stulkan hjá brúnni“ kemur engin niðurstaða en tillaga birtist: „Varstu að leita að: Stúlkan hjá brúnni“. Þessi virkni er ekki fullkomin þar sem ekki koma tillögur um ný leitarorð í öllum tilfellum en samt sem áður er þetta góð viðbót.
• Á forsíðu leitir.is er nú hægt að takmarka leitina áður en leitað er með því að velja úr felligluggum sem birtast undir leitarglugganum. Mögulegt er að takmarka leitina við efnistegundir, ákveðin leitarsvið og því hvernig er leitað, þ.e.a.s. hvort um sé að ræða nákvæma orðaröð, leitað að einstökum orðum eða bara að leitarorði í byrjun sviðs.
• Búið er að lagfæra „Höfundaflokkinn“ í „Þrengja niðurstöður“ þannig að fæðingar- og dánarár birtast ásamt deilisviðum b og c sem eru titill (páfi eða drottning) og starfsheiti (prestur eða kvikmyndagerðamaður) þegar nauðsynlegt er að aðgreina einstaklinga með sama nafn.
• Pláss fyrir nafn á „Mínum síðum“ var of lítið þannig að oft birtist einungis hluti nafnsins. Nafnareiturinn hefur verið stækkaður og sýnir nú allt nafn lánþegans.
• Upplýsingum um stöðu prentaðs efnis, þ.e.a.s. í hvaða safni efnið er til og hver er staða þess (t.d. í útláni eða hillu), hefur verið breytt. Núna birtist textinn „Hvernig næ ég í efnið?“ í staðinn fyrir „Aðgengilegt“ eða „Gæti verið aðgengilegt“.