2

Main content

main

Saga

Landskerfi bókasafna hf. var stofnað 14. nóvember 2001 af íslenska ríkinu og flestum sveitarfélögum landsins. Félaginu var ætlað það hlutverk að reka sameiginlegt bókasafnskerfi fyrir landið en það hafði verið boðið út á Evrópska efnahagssvæðinu árinu áður.  Aðdragandi verkefnisins var sá að árið 1998 var stofnuð nefnd af hálfu menntamálaráðherra sem hafði það hlutverk að gera tillögur um val á nýju bókasafnskerfi sem nýtast skyldi fjölbreyttum hópi safna þar með talin landsbókasafn, háskólabókasöfn, almenningsbókasöfn, skólabókasöfn og rannsóknarbókasöfn. Markmiðið var einkum að auka hagræðingu í rekstri bókasafna með því meðal annars að koma í veg fyrir tvíverknað við skráningu bókfræði- og notendaupplýsinga, auka gæði og áræðanleika gagnanna og komast hjá rekstri og viðhaldi margra bókasafnskerfa með tilheyrandi kostnaði. Einnig var markmiðið að tryggja jafnræði íbúa Íslands með því að gera safnkost bókasafnanna aðgengilegan á netinu.

Niðurstaða útboðsins um bókasafnskerfi varð sú að gengið var til samninga við Ex Libris um kaup á Aleph bókasafnakerfinu, sem fékk nafnið Gegnir á íslensku. Kerfið var formlega tekið í notkun og vefur opnaður þann 19. maí 2003.

Á árinu 2006 var SFX-krækjukerfið innleitt fyrir háskóla- og hluta rannsóknarbókasafna í samlaginu. Næsta stóra áfanga í kerfisrekstrinum var náð 11. nóvember 2011 er safnagáttin leitir.is var opnuð en hún byggir á hugbúnaðinum Primo frá Ex Libris. Frá upphafi var framtíðarsýnin sú að veita ekki aðeins aðgang að safnkosti bókasafna í gegnum safnagáttina heldur einnig annarra safna svo sem minjasafna, listasafna og ljósmyndasafna og hefur það gengið eftir að miklu leyti. Haustið 2013 tók félagið að sér rekstur menningarsögulega gagnasafnsins Sarps og sarpur.is en þau eru í eigu Rekstrarfélags Sarps.

horizontal

fblikebutton_dynamic_block